إمام عاشور يكشف كواليس بداية مفاوضات الأهلي لضمه 

كشف إمام عاشور كواليس بداية مفاوضات الأهلي لضمه بعد رحيله عن الزمالك وانضمامه إلى ميتلاند في رحلته التي لم تستمر طويلًا.

تفاصيل مفاوضات الأهلي مع إمام عاشور

وقال إمام عاشور في تصريحات تليفزيونية عبر قناة الأهلي: “بعد أن تعرضت للإصابة مع ميتلاند وكيلي أحمد يحيى قالي أمير توفيق عايز يكلمك يتطمن عليك”.

وتابع: “أمير كلمني اتطمن عليا وقالي سلامتك ومكلمنيش في أي حاجة تخص الأهلي، وبعدها روحت الزمالك كنت بتعالج شهر ونص في النادي”.

وأضاف: “أبلغت المسئولين في الزمالك أنني أرغب في العودة، في مسؤول موجود حاليًا في النادي قالي ادفع انت الفلوس لميتلاند وتعالى”.

واستكمل إمام عاشور: “لما الموضوع اتعقد لقيت وكيلي بيقولي استاذ أمير توفيق هيكلمك ومجرد ما كلمني قفلت قصة الزمالك خاصة إني ملقتش تقدير وقلتله شرف لأي حد إنه يلعب للأهلي، ومجرد ما الناس في الزمالك عرفوا قصة الاهلي رجعوا يكلموني مردتش على حد”.

واسترسل: “معرفتش اتأقلم في الدنمارك معاهم بسبب اللغة والأجواء لحد ما اتعرضت للإصابة ووقتها خدت قرار إني أمشي وأروح أي مكان ومكنش فيها وقتها أي حاجة تخص الأهلي”.

وزاد عاشور: “أول مرة قابلت كابتن محمود الخطيب بعد ما انتقلت للأهلي قالي ركز في التمرين والملعب ومتركزش في أي حاجة وقالي متخسرش جمهور الزمالك”.

وشدد: “مفيش حد في مصر هيجيله عرض من النادي الأهلي و هيرفضه، و لما كابتن أمير توفيق كلمني للأنضمام للأهلي قفلت صفحه نادي الزمالك نهائيًا، وقولتله أنا شرف ليا اني البس تيشرت القلعة الحمراء”.

وذكر: “محصلش مني أي حاجه تستفز أي حد مني غير إني بكسب بطولات و بحتفل مع فرقتي، وجمهور الزمالك بيقول عليا حاجات مينفعش تتقال وأنا عارف هما بيقولوا كده ليه و عاذرهم بس مش هينفع أقول هما بيقولوا كده ليه”.

أرقام إمام عاشور مع الأهلي

وكان إمام عاشور صاحب الـ 26 عامًا قد انتقل إلى صفوف الأهلي خلال فترة الانتقالات الصيفية عام 2023.

وشارك مع الأهلي في 54 مباراة وسجل 12 هدف وصنع 11 آخرين، وحصد 5 بطولات خلال هذه الفترة.