حسين الشحات يدعم أحمد فتوح برسالة مؤثرة
دعم حسين الشحات لاعب النادي الأهلي، زميله أحمد فتوح لاعب نادي الزمالك ومنتخب مصر، بعد واقعة دهس مواطن على طريق العلمين.
وكتب الشحات على صفحته الرسمية على موقع التواصل الاجتماعي “فيس بوك”: “أنا عايز اتكلم في موضوع كلنا بقينا بنتكلم فيه بس محدش حاسس بحاجة”.
وأضاف: “الموت بقى قريب مننا كلنا وناس كتير بقت تموت من كتر الضغط النفسي وشوفنا اخونا وصاحبنا احمد رفعت ربنا يرحمه يارب، وشوفنا الأب الروحي الكابتن ايهاب جلال”.
وتابع:” أنا كنت من فتره قريبة وقت مشكلتي مع الشيبي كان عليا ضغوط ربنا وحده اللي كان عالم بيها وطلعت واعتذرت، ودلوقتي مش عايزين نوصّل موضوع أحمد فتوح لكده ونرجع نقول بعد كده ياريت كنا خفينا عليه”.
وأردف: “فتوح غلط وقال أنا غلطان مش لازم نتكلم ونقول لا أنت غلطان ونضغط عليه، أي راجل لما بيطلع يعتذر ويقول أنا غلط سامحوني، أولا دي حاجة كبيرة جدا عند ربنا، والراجل طلع وقال أنا غلطان وعايز يروح لاهل المتوفي ربنا يرحمه يارب ويصبر اهله واولاده يارب”.
وأكمل: “مش كل شوية نطلع ونقول حسين أنت شتمت حسين انت غلط، نفس الكلام برده فتوح مش كل شويه نطلع ونقول انت غلطان ادعي لفتوح ربنا يهديه ويسامحه ادعي لحسين ادعي لاي إنسان بيغلط ربنا يهديه و يسامحه”.
وأوضح الشحات: “كل بني آدم خطاء وخير الخطائين التوابين، ربنا يهدينا جميعا ويسامح الجميع يارب الدنيا مش مستاهله، واتقوا يوما ترجعون فيه إلى الله ثم توفى كل نفس ما كسبت وهم لا يظلمون”,
